Ech läuschtren grad Musek mam Genius am iTunes (wat eng Ausdrocksweis!), do lafen zwee Lidder hannereneen: “Dreaming of You” vun The Coral an “Ever Fallen in Love” vun de Buzzcocks, an do fällt mir op: hey! Dat sinn dach d’Lidder zu deenen den J.D. an d’Elliott a Scrubs sech fir d’éischte Kéier, an fir d’éischte Kéier no hirer éischter Trennung kréien.

Fazit: Genius = Genius, Chris = Geek.
PS: als nächst Lidd koum “Superman” vum Lazlo Bane.
PPS: d’Top 10 Teléserien wéi vun iech gewielt, gi geschwënn hei publizéiert. Sidd prett fir Iwwerraschungen.

Virun 8 Joer hunn ech, an bestëmmt och vill vun iech, fir d’Éischt iwwer eng Reklamm op Pro7 vun Scrubs héieren. Verschiddener vun iech wäerten, grad wéi ech, och glat an guer naicht dervun gehal hunn. Klamauk. Iwwerflächlech Charakteren. Geschmaachlosen Humor. Trash eben.

Wat hat ech mech geiert! Kaum eng aner Sendung war esou Bauchwéi-erzeugend witzeg, an ass et vun Season zu Season bliwwen. Kaum eng aner Sendung hat sou wonnerbar gezeechent an gespillt Charakteren, déi, egal wéi absurd hier Handlungen waren, ëmmer mënschlech geschéngt hunn. Kaum eng aner Sendung hat sou immens onwahrscheinlech an trotzdem novollzéibar wierkend Episoden. An virun allem hat keng Sendung all dat zesummen. 

Scrubs war net groussaarteg well all Folg sou witzeg war, dass een nach driwwer gelaacht huet nodeems een se schon 4 Mol gesinn hat. (An daat ass net iwwerdriwwen. Ech hunn se méi oft gesinn.) Et war net sou groussaarteg well een all Folg sou mat den Charakteren gelidden, gelaacht an sech gefreet huet, dass een den Androck hat se tatsächlech perséinlech ze kennen. (Schliisslech verbréngt een mat hinnen méi Zäit wéi mat all Film-Charakter.) Nee, Scrubs war groussaarteg well béides an 20 Minutten geschitt ass, ouni dass dat eent dat anert ennergruewen hätt. An déi aussergewéinlech Mëschung gouf et an ausnahmslos alleenzelner Folg. Nenn een mer eng schlecht Scrubs Episode.

Lo ass déi lescht Folg gelaf. An net nëmmen war déi Episode en würdegen Ofschloss zu der Sendung, mais een vun deenen intensiivsten Momenter déi ech bis lo virun engem Bildschierm erlieft hunn. D’Folg ass witzeg dass een haart muss laachen, emotional dass se net just Fans ergräift an huet en Message deen méi relavant an passend net kéint sin. Déi lescht Minutten, déi lescht wonnerschéin, poetesch Sequenz (déi net den ze erwaardenden Réckbléck  war)  huet mech un all déi Freed erënnert, déi déi Sendung mer bereet huet. An och wann et vläitiwwerzunn klengt:  Dat ass keng Klengegkeet, wann een bedenkt wat grad riwwer gaang ass.

Ech hunn 8 Joer laang intensiv an mat Leidenschaft Scrubs gekuckt. Dat ass méi laang wéi meng Zäit am Lycée. Et ass méi wéi en Drëttel vun mengem Liewen. Wahrscheinlech huet  keng aner Sendung, keen Film an keen Buch sou een déifen Afloss op mech gehat. Dat ass keen eidelen Ausdrock, wann ech bedenken wéi Interessi an Film an Fernseh, grad wéi mäin Musekgeschmaach oder seguer mäin Humor sech vun Scrubs beaflosse gelooss huet.

Dës Sendung war net nëmmen mir vill wäert, mais ech sinn iwwerzeegt dass et en humoristesch, kenschtlecheresch, emotional an mënschlech wäertvoll Meeschterstéck vun der moderner Kultur war. Wann Fernseh duerchschnëttlech och nëmmen ob engem Zéngtel vun dem Niveau wier,  deen Scrubs fierleet, dann kéint et mat Sécherheet net méi als den Medium vun deenen Dommen duergestallt ginn. An dat mécht mech grad sou traureg wéi den Schluss vun der Sendung selwer: Ech fäerten dass ech soubal keng Sendung méi wäert fannen déi et packt Fernseh kucken esou faszinant ze maachen.

Scrubs war Fernseh um absolut héchsten Niveau. Merci.

1.4. My Old Lady
Den Nic huet Recht. D’Tatsaach, dass ech dës Episod vergiess hunn war e major fuck-up mengersäits. Dofir huelen ech et well hei no. Den J.D. huet Angscht fir seng éischt Patientin där e méi no komm ass, goen ze loossen, wann déi decidéiert, dass et fir si un der Zäit ass – kritt vun hir allerdéngs mat op de Wee d’Liewen ze genéissen, fir dass en iergendwann och sou berouegt kann draus scheede wéi si. Eng wonnerbar Episod an där gewise gëtt, wéi schwéier et ass fir Dokteren mam Dout vun hire Patienten emzegoen.

5.7. My Way Home
Nach eng Episod, déi ech d’läscht Woch vergiess hunn, mä déi ech lo nach emol héich luewe muss. Déi 100. Episod vu Scrubs an d’Hommage vun der Crew un The Wizard of Oz ass einfach nëmme wonnerbar aus villerlee Grënn: d’Charaktäre gi virun Défie gestallt, déi se alleguer léisen – mee dat clevert dobäi ass, dass dat ganzt eben als Beaarbechtung vun dem wonnerbare Film vun 1939 geschitt, deen an Amerika de wichtegsten Deel vun der Popkultur iwwerhaapt ausmécht.

6.4. My House
Dass Scrubs House nomécht ass jo scho clever genuch, vu dass nëmme Blanner wuel gleewen, dass den House net deelweis op dem Dr. Cox baséiert. Mä wat ech un dëser Episod am beschte fannen, ass wéi eemol d’Carla am Mëttelpunkt steet, ouni dass iergendeen et wierklech mierkt. Während d’Wourecht iwwert dem Carla seng Ängscht vu bäussen ganz offensichtlech ass, dréit sech d’Rad fir d’Leit an der Show weider, wéi wann näischt wier.

6.6. My Musical
D’Musical ass clever gema, d’Lidder si genial an nach emol: Musical! Ech mengen jidderee misst wëssen, dass ech op Musicals stinn. A mat Recht.

6.14. My Long Goodbye
D’Laverne läit um Stierwen an all d’Dokteren soen em Äddi, just d’Carla fënnt et schwéier senger gudder Frëndin eng gutt Rees ze wënschen. Eng vun den emotionalsten Episode vu Scrubs, well de Schock an d’onsënneg Brutalitéit vun dësem Accident d’Dokteren emol selwer net als Betruechter, mä als Betraffener trëfft. Gläichzäiteg kënnt dem Dr.Cox säin zweet Kand op d’Welt: domat gëtt de Kreeslaf vum Liewen weider beschriwwen.

7.8. My Manhood
Den J.D. an den Turk probéieren sech géigensäiteg an hirer Männlechkeet ze iwwertrompen – a fir d’éischte Kéier schéngt den J.D. op der gewonnener Säit ze stoen. Den Janitor schreift eng Zeitung, d”Janitorial” a publizéiert nëmme grousse Kabes.

7.9. My Princess
Den Dr. Cox erzielt sengem Jong vu sengem Dag an der Klinik an erzielt dës Geschicht a Form vun engem Märchen. Wann een dem Zach Braff gleewen dierf, war et dee Moment déi deiersten Episod, déi se bis dohi gedréit haten, an och déi bescht. Iwwerduerchschnëttlech gutt war se op jidfer Fall.

8.3 My Last Words
Den J.D. an den Turk sëtzen nieft engem ale Mann um Bett a begleeden en während en um Stierwen ass, well se mierken, dass de Mann alleng ass, an et fir si dee Moment méi wichteg ass dësem Mann e würdevollen Ofgang ze besuergen, wéi raus ze goen, fir hire fräien Owend ze genéissen. Dobäi schwätzen se iwwert den Dout an d’Ängscht, déi all Mënsch huet – an halen sech allerdéngs och eng gewëssen Hoffnung.

8.5. My Happy Place
Den J.D. an d’Elliot verbrénge vill Zäit mat eneen a kommen an d’Gespréich iwwert hir Bezéiung. Duerch d’Hëllef vum Dr. Kelso realiséieren se, dass se sech just virun sech selwer verstoppen, an dass et eigentlech näischt gëtt wouvir ee sech schumme bräicht. Zur nämlechten Zäit gewënnt den Turk dem Dr. Cox säi Respekt. Witzegerweis gëtt un e Witz geduecht, deen an der zweeter Staffel schon emol gemaach gouf – an dat fannen ech als freakeschen Oberfan natierlech genial.

8.13. My Full Moon
Dës Episod hëllt eis gewësserweis zréck an déi éischt Staffel, vu dass mer rem méi no un Interns dru sinn. Mer gesi wéi déi nei jonk Leit, déi selwecht Onsécherheeten un den Dag leeën, wéi den J.D., d’Elliot an den Turk um Ufank. Zu där Zäit diskutéieren den Turk an d’Elliot iwwert hir Zukunft mam Elliot senger schlussendlecher Asiicht, dass hatt net éiweg kann an deem Beruff bleiwen, an deem et all Dag mat sou vill Leed konfrontéiert gëtt.

8.15 My Soul on Fire, Part 2
“I love you more than Turk” sinn d’Wierder, déi een eigentlech zënter der éischter Staffel vum J.D. héiere wëll, och wann een et selwer net weess, an an dëser Episod seet den J.D. dës wuel romanteschst Ausso déi een sech a Scrubs virstelle kann zum Elliot. Well et net genuch Romantik gi kann, gëtt den Janitor och nach bestued, an et huet een d’Gefill, dass e fir d’zweete Kéier ganz éierlech a Scrubs ass (déi éischte Kéier misst da wuel an 4.19. gewiescht sinn). Fir de Comic Relief gëtt et dann natierlech nach de Bob Kelso, den éischte Cameo vum Bill Lawrence, a schlussendlech als Kiischt um Kuch sengt den Ted “Hey Ya” vun Outkast. Wat eng brillant Episod – däerf ech et soen? – et ass eventuell déi bescht.

8.18. My Finale
Och wann d’Episod vläicht net esou gutt ass, wéi munch aner, well se Laacher an medizinesch Fäll vermësst, ass se dofir fuerchtbar emotional. Et gëtt ofgeschloss, an zwar wéi et sech fir Scrubs gehéiert mat enger Phantasie an der Hoffnung, dass se dës Kéier wouer gëtt. Den Dr.Cox seet wat e vum J.D. wierklech hält, den J.D. an d’Elliot ginn e Schrëtt weider an hirer Bezéiung an mer ginn endlech dem Janitor säin Numm gewuer. Oder och net. Déi läscht zéng Minutten allerdéngs si fir e wierkleche Fan kaum z’erdroe gewiescht, well se sou schéin an emotional waren, mat engem Réckbléck op alles wat war an engem Ausbléck op dat wat kommen dierf. Dat zum Peter Gabriel sengem Cover vun de Magnetic Fields hirem “Book of Love”. A ganz zum Schluss gi mer entlooss mam Lazlo Bane sengem “Superman” wat eis 8 Joer laang an all Episod ageleet huet.

An et ass schéin, war schéin a wäert schéi bleiwen. An dofir sinn ech dem Bill Lawrence, Zach Braff, Sarah Chalke, Donald Faison, Neil Flynn, Ken Jenkins, John C. McGinley, Judy Reyes, Christa Miller, Robert Maschio a villen aneren dankbar.

Star Trek war brantasmic. (Bewertung: ****/****)

Dofir wëlle mer Scrubs gedenken, an dräi Bäitreeg. Ech loossen déi bescht Episoden an zwee Deeler Revue passéieren, während den Nic en Noruff op dës groussaarteg Serie wäert verfaassen.

1.1. My First Day
Dem J.D., Elliot an Turk hiren éischten Dag. Mat vill Selbstvertraue gestart gi se séier vun der Wourecht ageholl a mierken, dass Dokter sinn e knallhaarde Beruff ass, deen net vill Glamouréises u sech huet. Den J.D. fënnt am Dr. Cox säi Mentor, den Turk mécht sech fir d’éischte Kéier un d’Carla erun an déi legendär Penny-Szen begrënnt dem Janitor säin Haass op den J.D. Dës Episod ass ouni Zweifel de grousse Klassiker ënnert de Scrubs-Episoden, a wéi sollt et och anescht sinn: et ass déi éischt.

1.11. My Own Personal Jesus
Den Turk verléiert säi Glawen wéi e mierkt, dass Gott net jidderee gerecht behandelt op Chrëschtdag, an mat sou ville schrecklechen Accidenter konfrontéiert gëtt. D’Carla an den J.D. sinn um Ufank och net extrem hëllefräich, man allerdéngs hiert Bescht fir den Turk rem opzebauen. Um Schluss hëlleft e Wonner.

1.15. My Bed Banter & Beyond
Nodeem den J.D. an d’Elliot zesumme kommen, gesi mer eng Kommunikatioun op dräi Ebenen: éischtens dem J.D. an Elliot hiert Gespréich am Bett, begleet vun enger Pizza, déi als Auer déngt. Zweetens d’Evenementer vun hirer kuerzer Bezéiung, déi se realiséieren dinn, dass se net beienee gehéieren. An drëttens d’Interviews duerch eng Psychologin, an där mer d’bannescht Virgäng vun eisen Haaptpersonnage gewuer ginn.

2.10. My Monster
D’Sacred Heart Hospital ass e Monster, wat de Leit hir Motivatioun an hiert Liewe frësst. D’Elliot verléiert säin Doheem a lieft an engem Truck an den J.D. verléiert säi Mojo, well en d’Lisa net kësse kann, no all de schlëmme Saachen, déi en alldeeglech an der Klinik gesäit. Um Schluss hëllefen déi zwee sech géigesäiteg, an deem se rëm “zesumme” kommen.

2.15. His Story
D’Narratioun ass dës Kéier net dem J.D. seng Aarbecht, mä dem Dr. Cox seng. Dëse begleede mer zu sengem Psychiater an duerch d’Gefill eigentlech ganz alleng ze sinn. Niewebäi verloben sech den Turk an d’Carla, och wann den Turk d’Carla all ze oft froe muss, an eigentlech scho sou gutt wéi opginn huet.

3.14. My Screw Up
Den Dout vum Ben, dem Dr. Cox sengem beschte Frënd, ass déi éischt richteg tragesch Episod a Scrubs a gëtt vu villen och als déi bescht ugesinn. Et geet dorëm wéi d’Mënschen mat den Défien, déi d’Liewen engem stellt, ëmginn an et geet virun allem dorëm Neierungen acceptéieren ze kënnen.

4.06. My Cake
Dës Kéier stieft dem J.D. säi Papp, säi Brudder, den Dan haust doropshin bei him, a stellt alles op d’Kopp, während den Turk rausfënnt, dass en Diabetes huet. Alt erëm bréngt Scrubs et also fäerdeg mat alldeeglecher Dramatik ze punkten. Den Dout a Krankheet als Deel vum Liewen ze huelen, ass eppes, wat sou vill Serien am Versuch grouss ze wierken, net packen. Hei ass et perfekt duergestallt.

4.08. My Last Chance
Vu dass den J.D. nach ëmmer am Clinch mam Elliot ass, probéiert hatt him seng Bezéiung mam Molly Clock ze sabotéieren – an ass dobäi zimlech erfollegräich. Zur nämlechten Zäit muss den Dr. Cox an der Ambulanz seng Ronne mat enger dauernd schwätzender Fra verbréngen, a realiséiert réicht ze spéit, dass d’Fra domat hire Misär versicht z’iwwerspillen. Wonnerschéin gëtt dobäi duergestallt, wéi mer eis all Dag iwwer Klengegkeete vu Leit opregen, ouni eis ze froen, wat déi Leit eventuell grad duerch maachen, dat hiert Behuelen erkläre géif.

4.21. My Lips Are Sealed
Den J.D. an d’Carla hu sech gekësst an den J.D. behëllt sech fir d’alleréischte Kéier (wéi ech denken) wéi e richtege Mann, wann en dem Turk seet, e misst sech gefällegst méi dru ginn, wann e wéilt, dass seng Bezéiung mam Carla weider funktionnéiert amplaz de Feeler bei aneren ze sichen.

5.03. My Day at the Races
Den J.D. gëtt 30 Joer al a mierkt, dass en nach guer näischt a sengem Liewen fir sech selwer erreecht huet a wëll doropshin bei engem Triathlon matmaachen a scheitert natierlech grandios. Et ass eng vu menge léifsten Episoden, well den J.D. einfach a senger ganzer Verrécktheet mol nees richteg am Mëttelpunkt steet.

5.20. My Lunch
Dëst ass wuel generell eng vun de berühmtesten Episode vu Scrubs. Et ass den Dout vum Jill Tracy duerch Tollwut, an d’katastrophal Konsequenzen déi dësen op dräi weider Patienten, a virun allem den Dr. Cox hunn. A virun allem och d’Feststellung, dass en Dokter och e Mënsch ass, deen ausserhalb vu sengen Aarbechtszäiten et verdéngt net Dokter sinn ze mussen.

5.21. My Fallen Idol
Den zweeten Deel vun dëser Duebelepisode an de Prozess an deem den Dr. Cox erëm u säin aalt Ech erugefouert gi soll. Den J.D. huet wéi ëmmer Angscht sech sech selwer ze stellen, an doduerch dem Cox ze hëllefen.

An zwar en Charlie Brown Filmchen, ageschwat vum Cast vu Scrubs. Eng schéin nei Versioun ménger Meenung no.

Click here to view the embedded video.

“I like to get my holiday rectal exam.” Herrlech.

Mir alleguer wësse jo, dass den Turk an den J.D. eng platonesch Léift pflegen an dat heie Lidd ass e schéinen Ausdrock dovunner, a wann dat net d’Lidd vum Joer ass, wees ech o net.