Italien – Peru 1:1
Italien – Argentinien 1:1
Italien – Mexiko 1:1
Italien – Chile 2:2
Italien – Mexiko 1:1
Italien – USA 1:1
Italien – Paraguay 1:1
Dir frot iech vläicht, wat wëll déi wilkürlech ausgewielten Rei vu Fussball-Resultater hei virun dem Artikel? Gutt Fro. D’Äntwert ass awer och genee sou séier parat. Et sinn d’Resultater vun italienesche Virronnematcher géint amerikanesch Ekippen zënter 1982. Wéi der gesitt, hu se (bis op 1990 am eegene Land géint d’USA) ëmmer gläicht gespillt. En anert Resultat, wier also guer net dra gewiescht.
Dovun ofgesinn war Italien géint Paraguay de beschte Match, deen ech bis ewell bei der WM gesinn hunn. D’WM-Touristen ënnert iech wäerte lo just hir Vuvuzelas verschléckt hunn, wéi se dat gelies hunn, well ech net geschriwwen hunn, dass Däitschland géint Australien de beschte Match war. Mä fir mech ass e gudden – am Géigesaz zu engem kuckenswäerte – Match, een an deem béid Ekippen sech op engem ähnlech staarken Niveau befannen. Dat war bei Italien a Paraguay op jidfer Fall esou. D’Qualitéite vun den Teams ware méi wéi erkennbar, an dass et nach weidert Steigerungspotenzial bei allen 28 agesate Spiller gëtt, ass och villverspriechend.
Absolut näischt versprach hunn souwuel Japan a Kamerun. Während ech mech iwwer d’japanesch Victoire e bësse gefreet hunn, well déi manner katastrophal Ekipp gewonn huet, froen ech mech wat der Däiwel sech d’Traineren vu béiden Ekippen bei deenen Opstellungen geduecht hunn. Et ass mer einfach onerkläerlech, mä erkläre muss mer wuel och kee méi et, well déi zwee Länner lo wuel nach je 6 Punkten un Holland an Dänemark ginn, an dann dierfen se et a Brasilien rëm probéieren.
Zum Match Holland géint Dänemark bleift net vill ze soen, ausser, dass wuel den Eljero Elia nächste Kéier vun Ufank u spillt. D’hollännescht Spill war laang zerfuer an ass wierklech réischt passabel ginn, wéi d’Dänen hinnen den 1:0 geschenkt hunn. Mä an engem éischte Match muss een och wierklech nach net brilléieren.
No menger Rage op de Bela Rethy an der KMH-Affär hunn ech haut, no deem ech et nach emol bei ARD an RTL probéiert hunn, decidéiert d’Matcher um Belsch ze kucken. Dat war eng gutt Entscheedung, well se do wierklech einfach net sou domm hir sabbelen.
Held vum Dag: Daniele de Rossi, Italien
Beschte Spiller vum Dag: Eljero Elia, Holland
Schlechteste Spiller vum Dag: Benoit Assou-Ekotto, Kamerun
Weblink vum Dag: Schwarze und Weisse op 11Freunde.de
All Dag während der Weltmeeschterschaft schreift de Chris iwwer Fussball, d’WM a wéi hien se erlieft.
Am Viraus beäntweren ech d’Fro déi ech gëschter opgeworf hunn. A leider war meng Äntwert falsch. Kee Schal wier richteg gewiescht. War wuel och eng gutt Idee vum Jogi, well sou wéi Däitschland gespillt huet, wier e wuel och ze vill an d’Schweesse geroden, hätt en e Schal ugehat. Eng insgesamt einfach nëmme perfekt Leeschtung vun Däitschland, bei där een héchstens bemängele kann, dass se net méi héich gewonn huet. Wann ech ufänken mech iwwer däitsch Goler ze freeën, mussen se iergendeppes sensationell richteg maachen. An op den Thomas Müller (deen ech mer fir 0,8 Mio. Euro am Kicker Interactive Manager Spill kaf hat) ze setzen, war zimlech richteg.
Eng falsch Decisioun hu se allerdéngs zu Mainz getraff. Dës war et dem Bela Rethy e Mikro ze ginn. Beim Bela Rethy senge Kommentaren wënscht een sech wierklech, dass ee während 90 Minutten zwou Vuvuzelas direkt nieft den Ouere plazéiert huet, fir sech dat net undoen ze mussen. Toppen konnt de Bela eigentlech just d’Katrin Müller-Hohenstein, wat an der Halbzeit déi sensationell Phrase “Für Miroslav Klose ein innerer Reichsparteitag” bruecht huet. Wann et domat net dat gemengt huet, wat ech mengen, dass et gemengt huet, ëm Gottes Wëllen, kläert mech op, wat et da war. Mir ass de Mond oppe stoe bliwwen.
De Mond oppe stoe bliwwen war bei der WM 2006 dem Asamoah Gyan, wéi en sech géint Tschechien, wéinst engem ze fréi geschossenen Eelefmeter, déi zweet giel Kaart am Tournoi ofgeholl huet an doduerch Aachtelfinale géint Brasilien verpasst huet. Ech weess nach wéi Leed mer hien deemools gedoen huet. Haut huet en dogéint alles richteg gemaach an säin Eelefmeter géint Serbien verwandelt a sou den Afrikaner déi éischt Victoire am Tournoi besuergt, an dat och, well den Kevin-Prince Boateng enorm staark war. Dass hien richteg gutt Fussball spille kann, wäert munch Däitschen iwwerrascht hunn, well e mat deem Wëssen net sou wonnerbar zum Buhmann gemaach kéint ginn.
Den drëtte Match vum Dag, deen anscheinend grotteschlecht war, hunn ech verpasst, well ech mat menger gudder Mamm an de Restaurant war. Z’iesse gouf et villes, an ech hu meng Léift zu hir ausgedréckt an deem s ech hir d’Biografie vum Stieg Larsson besuergt hunn. Informatiounen, déi der wierklech net wollt, mä vue dass de Larsson Antifaschist war, hunn ech mech eventuell rëm bis zum Katrin Müller-Hohenstein senger Ausso zréck gekämpft. Wéi kann ee sou eppes um Fernseh soen, ouni dass een et matkritt? Oder hunn ech et wierklech falsch verstan? Hoffe mer dat bescht.
Held vum Dag: Asamoah Gyan, Ghana
Beschte Spiller vum Dag: Thomas Müller, Däitschland
Schlechteste Spiller vum Dag: d’Australier ware sou schlecht, dass keen et verdéngt hätt net hei ernimmt ze ginn.
Weblink vum Dag: Bela Rethy sucks
photo cc by coda
