Schon ëm puer mol hu mir iwwer clever Reklammen hei geschwat, an ech denken et ass zemools den Thorben, deen sech ëmmer rëm doriwwer freet. Clever Reklammen ass d’Façade fir d’Welt vu Mad Men, der beschter Serie, déi momentan fir de Fernseh produzéiert gëtt. Während ech scho laang no engem Virwand gesicht hunn, meng Léift fir Mad Men an engem Bäitrag ze erklären – dir wëllt net wëssen, wéivill Drafts ech geläscht hunn, respektiv nach hei leien hunn, déi ech der Serie net wierdeg fonnt hunn – huet de Matthew Weiner a säi writing staff mer lo endlech e gudde Grond ginn.
An der Episod vun e Sonndeg gouf nämlech déi cleverste Reklamm bis ewell geschalt, an déi Kéier keen “it’s toasted” oder “Carousel” Pitch vum Don Draper, mä et ass eng Reklamm fir d’Serie selwer. Mad Men gëtt meta, a kënnt am Joer 2010 un.
Wéi de Pete Campbell am Joer 1965, 20 Joer nom Enn vum 2.Weltkrich wëll Honda zum Client vun der Agence maachen, reegt sech de Roger Sterling, Chef vun der Agence, deen am Pazifik gekämpft huet op an seet dat eenzegt wat méi schlëmm wier wéi e Japaner a senger Agence, wier den Dr. Lyle Evans. Kuerz nodeem de Sterling schnaubend de Sall verléisst, seet de Pete: “Who the hell is Dr. Lyle Evans?” “Who the hell indeed?” hu sech eng jett Fans geduecht an et gegoogelt, just fir ze mierken, dass déi Persoun absolut net diskussiounswierdeg war. Well se net existéiert.
Mad Men hunn de Leit souzesoen eng Virlag geliwwert fir op den Internet ze goen an mateneen ze diskutéieren, wien déi Persoun wier, déi do erwient ginn ass. A während dës Show sécherlech scho relativ bekannt ass, ka se doduerch trotzdem just d’Interesse vun de Leit steigeren. Dat nennen ech verdammt cleveren Marketing.
Mä manner hätt ech mer wierklech och net erwaart vun enger Show, déi all Woch nees u Grenze geet, déi sech vill aner Serien guer net virstelle kënnen. Eng Serie, bei där d’Personnagen, ouni sech grouss ze veränneren, awer ëmmer méi räich un Facetten ginn. Eng Serie an där et keng Béiser, a keng Gudder gëtt, mä just Leit, déi wëlle liewen, a liewen a liewen. Bon, zu menger manescher Veréierung vun Mad Men en vue vun deene Punkte vläicht eng aner Kéier.
Et gëtt leider keen Ausschnëtt vun der Zeen op Youtube. Ech hunn zwee Deeg mam Artikel gewaart, an der Hoffnung, dass een optaucht. Méi laang konnt ech net méi waarden.
(off-topic, sorry, mee dat intriguéiert mech)
‘Schon ëm puer mol’? Wier dat net éischter ‘Schon e puer Mol’?
Gutt Fro.
Grammatesch misst et wuel “e puer” sinn.
Wann ech mer et haart virsoen, héieren ech awer definitiv en /m/.
Dat muss awer dann un ärem Dialekt do uewen leien ;)
Ech tippen méiglech Réckblenden iwwert den Sterling aus sénger Zäit am Krich. Do wärt a séngem Grupp en Lyle Evans gewiescht sin, deen sou eppes à la “Japaner sin och just Mënschen a net de Feind” sot.
An ech hoffen, d’Sally kritt lo mol vun der Schoulpsychiaterin ordentlech erziëlt, wat jonk Meedecher alles sollte wëssen, wéll séng Mamm jo incapable ass, dat ze maachen.
Hu mer d’Episode gëschter nach emol ragezunn, an ech ka just dat widderhuelen, wat ech säit bal zwou Staffelen ëmmer rëm soen: aarmt Sally. E Papp, deen net weess, wéi en ka besser mat him ëmgoen, an eng Mamm, déi et net emol probéiert. Wat allerdéngs gutt ass: d’Sally wäert definitiv an e puer Staffelen Drogen huelen. Gëtt interessant.
Op der anere Säit: aarme Bobby. dee kritt wéi ëmmer just déi Zeilen ze soen, déi fir d’Sally net cool genuch sinn. “You look like a mongoloid!” Witzeg, mä och wierklech just Bobby. D’Sally hätt dat mat méi Eloquenz a Brutalitéit hikrut.
Fazit: ech kéint Deeg domat verbréngen all eenzeg Episod ze analyséieren.