Dass ech kee grousse Frënd vun den animéierte Filmer vun Dreamworks sinn, hunn ech schon em puer mol erklärt. Allerdéngs schéngt et mer ëmmer méi, dass ech meng Meenung revidéire misst. No Kung Fu Panda ass Monsters vs. Aliens den zweete Film bannen zwee Joer vun deem ech ganz labber behaapten, dass et de beschte Film ass, deen Dreamworks Animation bis well gemaach huet.
Monsters vs. Aliens spillt intelligent mat de Filmer vun de 50er Joeren, an deene Monster an Aliens als grouss Gefoer fir de Planéit an virun allem d’Vereenegt Staaten duergestallt ginn – dese Film léisst se lo géinteneen untrieden. D’Äerd gëtt zënter 50 Joer duerch eng amerikanesch Organisatioun vun optauchende Monster “beschützt”, bis dass d’Susan optaucht, wat um Dag vu senger Hochzäit vun engem Meteorit getraff gëtt a sou zu engem Ries mutéiert. Dese Meteorit, an d’Substanz déi d’Susan wuesse léisst, gëtt allerdéngs vun engem Alien gesicht an dofir schéckt desen seng Truppen op d’Äerd fir et ze fannen. Also ginn d’Monster befreit fir d’Aliens ze bekämpfen.
Sou ass Monsters vs. Aliens e Film voller Referenzen u Sci-Fi Klassiker, deen allerdéngs och extrem kandsgerecht geroden ass. Nieft dem typeschen Witz iwwer d’modern politesch Lag an eenleches, dee virun allem Erwuessener soll ameséiren, gëtt et och sou munches, wat exakt op Kanner zougeschnidden ass. An dat ass och dem Film seng eenzeg Schwächt – Kanner ginn alt nees fir domm verkaf, eppes wat bei Pixar net geschitt. Et ass en allgemengen Ierglawen, dass Kanner vereinfacht Witzer brauchen fir sech ënnerhal ze fillen. Trotzdem huet Monsters vs. Aliens genuch Stäerkten fir dest z’iwwerbrécken, sief et den urkomesche B.O.B. (geschwat vum Seth Rogen), den immensen Insectosaurus, oder och den Dr. Cockroach (Hugh Laurie). Mee virun allem D’Susan/Ginormica ass en immens gelongene Personnage, well genee sou wéineg wéi am üblechen Hollywoodfilm eng weiblech Figur däerf den Held sinn, ouni e Latexkostüm unzedon, ass dest an animéierte Filmer de Fall. Do ass dese FIlm dach erfrëschend a mol eppes neies.
Bewertung: ***/****
Ech konnt leider nach net eraus fannen, op dee Film am Utopolis och an 3D gewise gëtt.
Gëtt e leider net.
“An dat ass och dem Film seng eenzeg Schwächt – Kanner ginn alt nees fir domm verkaf”
Domat sinn ech nët averstan. Jo, verschidde Witzer sinn immens einfach, mais just well der e puer sou dra vierkommen verkaafen ech d’Kanner nach laang nët fier domm. Wann ech wees dat d’Wahrscheinlechkeet grouss ass, dat d’Kanner laachen wann den B.O.B. während en en Hotdog ësst zetrampelt gëtt an um Schong pesche bleift (Beispill), dann heescht dat nët dat ech vu menge jonke Zuschauer denken dat se nët méi wéi dat verstin. Zwar fehlen effektiv Witzer an der “Mëtt”, an dat hätt kënne besser gemat ginn. Mais wéi gesot, sinn nët mat där Konklusioun an Interpretatioun vun den Animateuren hieren Absichten averstan.
Wanns de lo gesot häss dat Kanner bei Teletubbies fier domm verkaf ginn, dann hätt ech nët den Hauch vun engem Widdersproch gehat.
:)
Nee, mee dat ass net d’Zort Witz bei deem se fir domm verkaf ginn. Wat ech domadder mengen, ass zum Beispill dem President säin Optrieden, d’Keyboard Szen virun allem. Dee Witz war ganz schwaach an huet just op primitiv Laacher higeziilt.
Jo, mais souguer dann, soulaang de Film eben nët haaptsächlech aus sou Witzer besteet, ass et an der Reih. An ech schléissen och hei aus dat se bei deem Witz deens de grad als Beispill ginn hues nëmme Kanner am Bleck gehaat kënnen hunn … hei hu bestëmmt och gewëss Erwuessener gelaacht.
dk
Ech fille mech ugesprach.
En primitiven Witz ass soulaang gudd, wéi en bewosst primitiv ass. D’Präsidenten-Szen gett net fier méi ze sin wéi pure Klamauk. An en Witz kann nemmen bewosst primitiv sin wann aaner Witzer méi sophistikéiert sin an e Verglach bidden. An där sin och vill am Film. Dofier ass et net ganz schlemm fannen ech.
Et ass just schued dass et ganz seelen ass dass Humor souwuel immens einfach wéi och ganz intelligent kann sin. En animéierte Film, deen daat gepackt huet wéi keen aaneren, ass menger Meenung no Ice Age. D’Szen wann daat lescht Dodo-Weibchen vun der Klipp sprengt fier eng Waassermeloun ze fänken ass op souvillen verschiddenen Niveauen witzeg. Daat fehlt e beschen am Monsters vs. Aliens.